NAGA CITY- Pigsaysay kan Department of Agriculture na mayorya kan nasa 120,000 minimum wage earners sa Bicol Region an mabenipisyar sa programa kan gobierno na P20 kada kilo kan bagas.
Sigun ki DA spokesperson Assistant Secretary Arnel de Mesa an mga benipisyaryo an nabisto sa paagi kan Department of Labor and Employment (DOLE).
Marurumduman, nagkasundo an DA asin DOLE na balihon an minimum wage earners sa pilot run kan subsidized rice initiative.
An programa an parte kan Kadiwa ng Pangulo campaign, na nagtutugot sa mga bulnerableng sectors na magbakal sa National Food Authority (NFA) asin sa subsidized na presyo na P20 kada kilo.
An mga benipisyaryo an kinababalihan kan indigent families, senior citizens, persons with disabilities, solo parents asin mga minimum wage earners.
An Food Terminal Inc. asin DA regional offices an nasugo na magdestrebwer kan bagas.
Pigsaysay kan opisyal na an DA nakalaom sa listahan na pigtao kan DOLE pag-abot sa mga obrero alagad pigsaysay kan Agriculture Department na bukas sinda na iiba an informal workers siring kan mga seasonal o unregistered employment, partikularmente sa micro, small, asin medium enterprise (MSME).
Mietrastanto, para sa masunod na rollout phase, an mga area na igwang halangkaw na poverty incidence an ipaprayoridad.
Kabali digde an parte kan Mindanao siring kan Zamboanga del Norte asin Bangsamoro Autonomous Region in Muslim Mindanao (BARMM).
