Dai pa nareresolberan an isyu kan posibleng pagbaba kan presyo kan komersyal na bagas sa nasyon, na may mga pangapodan na ibaba ini sa ₱20 kada kilo.
Sa intrevista kan Bombo Radyo Naga ki Cathy Estavillo- Bantay Bigas Chairperson,tinawan duon na padagos na nakakaeksperyensya nin mga “adventures” an mga paraoma huli sa mga kalamidad, halangkaw na presyo kan mga input arog kan abono, semilya, pestisidyo, asin langis, siring man an nagbabago-bago na presyo kan paroy.
Segun paki Estavillo na an sarong importanteng aksyon kan gobyerno iyo an pagtao nin subsidiya sa produksyon na sagkod sa ₱50,000 kada paraoma tanganing maseguro an padagos na pagtanom ngonyan na an panahon nin tag-uran yaon na sa sato. Dugang pa kaini, importante man an amay na pagtanom tanganing maibitaran an epekto kan posibleng grabeng tigmara na piglalaoman na magdadanay sagkod sa mga masunod na taon base sa report kan mga eksperto.
Idinoon man kan grupo an pangangaipo para sa mas mahiwas na halawig na pagplano sa agrikultura, kabali an mas matibay na mga sistema nin patubig, mga kontrol sa presyo kan mga input sa agrikultura, asin pagpugol sa padagos na pagkombertir kan mga oma.
Idinoon man kaini an takot na an piglalaoman na produksyon nin bagas, na pigkakarkulong 5.4 sagkod 5.8 milyon na tonelada, pwedeng maapektaran kun dai tulos matatawan nin atensyon an mga problema kan sektor.
Mientrastanto, nangapudan man an grupo sa publiko na magin kritikal sa mga rice products na ipinapabakal sa merkado, kabale na an blended rice, ngani na maseguro an kalidad asin nutritional value kaini.
Liwat man na pangapudan kan Bantay-Bigas para sa pag-repeal kan Rice Liberalization Law (RA 11203), na suboot nakaapektar sa kita kan mga lokal na paraoma asin sa kagabsan na presyo kan paroy sa nasyon. Mas makusog na suporta kan gobyerno para sa lokal na produksyon tanganing mabawasan an pagsarig sa mga importasyon asin mapakusog an seguridad sa pagkakan sa nasyon.
Mayo pang opisyal na pahayag an gobyerno manungod sa panibagong pangapodan para sa pagbugtak nin mas hababang presyo kan paroy asin dagdag na subsidiya para sa mga paraoma.
