Nag apela si Senator Kiko Pangilinan nin province-by-province preparedness plan komo pagpepreparar sa nilalaomang epekto kan Super El Niño.
Kabali sa saiyang panawagan an pagmidbid sa lambang probinsya kan mga lugar na may halangkaw na peligro sa drought asin dry spell, an available na irrigation water, mga tinanom na nakatanom na, mga komunidad nin paraoma asin parasira na posibleng maapektuhan, asin an mga lakdang na dapat gibuhon bago pa magkaigwa nin mahiwas na pagkalugi.
Hinagad man niya sa nasyunal na gobyerno asin sa mga local government unit (LGU) na agahan an paglatag kan preparedness plan asin dai na paghalaton na magpuon an nasambit na weather phenomenon para maghimo nin angay na lakdang.
Sa irarom kan nasambit na panawagan, irinekomenda kan senador sa Department of Agriculture (DA), National Irrigation Administration (NIA), Bureau of Fisheries and Aquatic Resources (BFAR), asin iba pang ahensya kan gobyerno na gibuhon na localized an mga pagpreparar laban sa epekto kan El Niño.
Kinakaipuhan man daa na pabilison kan DA asin NIA an paghirahay asin rehabilitasyon kan irrigation systems, partikularmente sa mga drought-prone areas, asin seguraduhon an tama sa oras na pagdistribwir kan drought-tolerant seeds asin iba pang agricultural inputs.
Kasabay kan panawagan para sa marikas na plano, hinimok man niya an DA na magkondusir nin marikas na assessment sa crop losses, affordable credit, insurance asin recovery assistance kasunod kan epekto kan tagtuyot, para dai malubog sa utang an mga paraoma asin parasira na mawawaran nin kita huli sa El Niño.
