NAGA CITY- Maogma an mga Pilipino na yaon sa United Arab Emirates sa pagbisita ni Presidente Ferdinand Bongbong Marcos Jr sa nasambitan ng nasyon.
Sa report ni Bombo International News CorrespondentLeonila Estepa, gikan sa Abu Dhabi, UAE, labing kaogmahan an namatean kan mga Pinoy orog na ta piglalaoman kan mga ini na madara nin magayon na resulta an 2 days working visit kan Presidente sa lugar.
Marurumduman, saro sa mga pangenot na obheto kan biyahe an pagtinta sa Comprehensive Economic Partnership Agreement o CEPA, na pigkonsederar na kaenot-enoting free trade agreement kan Pilipinas sa Gitnang Silangan.
Target kaini na pakusugon an kalakalan kan duwang nasyon asin magbukas nin mas kadakol na oportunidad para sa mga Pilipino.
Sa irarom kan kasunduan, mababa an buwis sa nagkapirang produkto, mas mapapahewas an merkado kan mga produktong Pilipino, asin mas eenkaminaron an pamumuhunan sa nasyon.
Siringman, piglalaoman na makriar ini nin mas kadakol na trabaho asin mas magayon na kita para sa mga Pilipinong obrero asin negosyante kun saen makikinabang sa kasunduan an haros 900,000 Pilipino sa UAE na kadaklan mga Overseas Filipino Workers (OFWs).
Mientrastanto, pigsaysay pa ni Estepa na haloy nang mayong nagbisita na Presidente kan nasyon sa Abu Dhabi kaya nagin positibo an reaksyon kan mga Pinoy sa kalawakan kan Punong Ehekutibo.
Sa ngunyan, hagad na sana ni Estepa na magin magayon an resulta kan pagbisita kan Presidente sa UAE para sa kapakanan kan mga Pilipino asin pag-uswag kan ekonomiya kan nasyon.
