Pigtuyaw sa ginibong pagdangog kan Senado an mga sangkaterbang problema sa mga istasyon kan Metro Rail Transit o MRT asin Light Rail Transit o LRT.
Naenot nang nagsagibo nin inspeksyon digde si Senator Raffy Tulfo asin man ipinaabot kan lehislador sa mga kaukulang ahensya an mga napansing problema asin man mga kakulangan.
Nagkapira sa mga natuyaw kan senador na problema sa pirang MRT asin LRT stations iyo an kakulangan kan beep cards sa ticket vending machines (TVM) asin man an dae pag ako kan mga TVM nin polymer na kwarta na nagigin kawsa kan halabang mahabang pila.
Dugang pa digde, an kakulangan kan signage sa connecting stations, asin man an dae maintindihan na Public Address (PA) System kan MRT nin huli ta garalgal an speaker.
Tulos man na pinareresolba ni Tulfo sa mga tanggapan kan Department of Transportation (DOTr) na in charge sa MRT asin LRT an mga napansing problema. Inobliga man kaini an mga opisyal na magsagibo nin regular na inspection sa MRT asin LRT stations tangani man sinda mismo an makahiling sa problema asin solusyunan ini tulos.
