NAGA CITY – Dagos-dagos soboot an mga programa kan NIA-Bicol na makakatabang sa mga tawo orog na sa Bicol Region.
Sa entrevista kan Bombo Radyo Naga ki Ma. Cleofe Baraero, tagapagtaram kan NIA-Bicol, sinaysay kaini na saro soboot sa saindang programa iyo an inaapod na Convergence initiaves kun saen aktibong nakikipag-koordinar sa sainda an DTI tanganing makabali an NIA sa pigkukundusir na Trade Fair na nagtatangro nin manlaen-laen na produkto sa abot kayang presyo.
Sigun ki Baraero, kadakol na soboot an nabisitang banwaan sa bilog na Camarines Sur sa paagi kan Kadiwa na pig-organisar kan DTI kun saen pigtatangro an P29 asin P35 na bagas.
Apwera digde, dagos-dagos pa man an Kadiwa sa NIA magin an programang Bigas sa Araw-araw na kun saen nagtatangro nin bagas para sa gabos na nag-aabot sa sampulong kilo kada tawo an pwedeng mabakal na dakula naman katabangan orog na sa presenteng panahon.
Katakod digde, piglalaoman na mauubos an suplay kan bagas na ginagamit digde na gikan pa sa Region 2 ngunyan na bulan kan Disyembre.
Sa ngunyan, pig-abisuhan na sana kan opisyal an publiko na pirmeng magbisita sa official facebook page kan NIA-Bicol para sa mga dugang pang anunsyo katakod kan saindang mga programa.
