Maduon na ipinahayag kan mga progresibong grupo asin an sektor nin edukasyon an saindang mga sentimyento manungod sa marikas na pagbabago kan liderato sa Senado asin an soboot bias kaini sa pagprotehir sa mga opisyales na napapaatubang sa mga seryosong kaso.
Sa intrevista kan Bombo Radyo Naga ki Vladimir Quetua kan Bagong Alyansang Makabayan, ipinahayag kaini an saiyang paghadit sa “pagiging sanctuary” kan Senado para sa mga indibidwal na nag-aatubang nin kaso sa International Criminal Court (ICC), kabale na si Senador Bato dela Rosa. Segun saiya, an isyu sa liderato kan Senado sarong distraction sa mas importanteng isyu nin accountability asin justice.
Nangapudan man an grupo sa tulos na pag-asenso kan kasong impeachment kontra ki Bise Presidente Sara Duterte, kasabay kan pangapodan na mahiwas na imbestigaran an mga isyung kinakahampang kan nagkapirang opisyales kan gobyerno. Sinambit man an isyu kan soboot maluway na aksyon sa mga kaso na may kinaaraman sa human rights asin corruption.
An epekto kan presenteng kamugtakan kan ekonomiya pinag-olayan man sa interbyu, na an 2.8% na pagtalubo kan GDP asin an paglangkaw kan kawaran nin trabaho pigtukar bilang mga indikasyon kan padagos na mga angat sa kabuhayan kan mga Pilipino. Segun sa sainda, an mga ordinaryong trabahador asin paratukdo an pinakanakakamati kaini.
Naihiras man an sitwasyon sa sektor nin edukasyon, kun sain segun ki Quetua, dakul na mga paratukdo an napipiritan na maggastos hale sa sadiring bulsa para sa basic teaching needs huli sa kakulangan nin materyal na suporta hale sa gobyerno.
Dugang kaini, sarong protest action plan an pig-anunsyo man sa atubangan kan Senado sa Pasay City kan Miyerkules nin aga, na may katuyuhan na pangapudan an accountability kan mga opisyales asin tulos na aksyonan an mga pendienteng isyu sa gobyerno.
