NAGA CITY-Nangangapudan ngunyan sa gobyerno partikularmente na sa Local Government Unit an mga residente kan Sitio Guintubdan La Carlota City, Negros Occidental nin dugang na mga medical equipment sa lugar.
Sigun sa mga residente, pira sainda an nagkamate asin nahahampang sa respiratory diseases puon kan magputok an bulkan kan nakaaging semana.
Kabali sa reklamo kan mga ini an pagkakaigwa nin sipon asin an nasasagap nindang malaen na parong kan abo asin sulfur na gikan sa bulkan.
An iba man soboot nakaeksperyensiya nin diarrhea huli na man sa kawaran nin malinig na inumong tubig sa saindang lugar.
Partikularmente na saindang pangapudan sa lokal na gobyerno an pagkakaigwa nin dugang pang oxygen tanks, mga kama sa ospital, asin magin nin iba pang mga kinakaipuhang supplies.
Sigun man ki City Social Welfare and Development Office head Angie Gelongo, an saindang City Disaster Risk Reduction Management Council nakapag-install na nin improvised clinic sa lugar, komo kasimbagan sa pangangaipuhan kaini.
Kun marurumduman nagpuon nin magputok an bulkang Kanlaon kan nakaaging semana asin nagbuga ini nin lampas 500 meters nin abo, rason tanganing isakat kan mga awtoridad an alert level 2.
Ini man pigsasakat pag may paglangkaw sa numero kan mga nairerehistrong paglinog dara kan bulkan asin iba pang aktibidades.
Nagpautob naman nin 60-day price freeze an Department of Trade and Industry sa banwaan nin La Castellana, na nasa irarom nin state of calamity huli sa pagragasa igdi nin lahar huli sa makukusog nin pag-uran.
