NAGA CITY – Pig-inspeksyon kan City Engineer Office an mga simbahan sa siyudad nin Naga tanganing masierto an kasalbaduhan kan publiko enkaso igwang magbungkaras na linog.
Sa entrevista kan Bombo Radyo Naga ki Engr. Elmer T. Albo, Acting Naga City Engineer, sinaysay kaini na kan nakalihis na semana nagkundusir sinda kan pig-aapod na rapid visual screening sa mga buildings kun saen an saindang prayoridad an mga simbahan.
Sigun ki Albo, simbahan an enot nindang pig-inspeksyon orog na ta kadakol na tawo an pirmeng yaon digde kun saen dapat na maasegurar na salbado anuman an mangyari.
Paliwanag ki Albo, sa paagi kan rapid visual screening saindang pighihiling an mga itsura kan mga edificio sa luwas.
Nagkukundusir sinda nin imbestigasyon siringman nag-iikot sa mga buildings tanganing mahiling kun marhay pa asin salbado pa ini sa publiko.
Mientrastanto, pigsierto man kan opisyal na saindang iinspeksyunon an mga public and pribate buildings sa bilog na siyudad nin Naga komo saro sa mga lakdang tanganing magin preparado enkaso makaeskperyensiya nin makusog na pagyugo-yugo.
Sa ngunyan, hagad na sana kaini an kooperasyon kan publiko para sa mas salbadong siyudad nin Naga.
