Magpapatupad an Metropolitan Manila Development Authority o MMDA nin mga paghihigpit sa trapiko asin pagsuspinde nin pampublikong aktibidad sa Metro Manila bilang pagpreparar sa ika-49 na ASEAN Summit.
Poon Oktubre 24 sagkod Nobyembre 20, pansamantalang isususpinde an pagtao nin permit para sa mga fun run, motorcade, prusisyon, asin iba pang kaagid na aktibidad sa Manila, Pasay, Parañaque, Makati, asin Taguig.
Katuyuhan kaini na malikayan an dugang na pagsisikip kan trapiko mantang pigpreparar an mga lugar asin ruta na gagamiton para sa regional summit.
Poon Oktubre 24, ipapatupad man an partial na paghihigpit sa Philippine International Convention Center o PICC asin sa Cultural Center of the Philippines Complex, na susundan nin full lockdown sa Nobyembre 7.
Magsisimula man an moratorium sa mga paghuhukay asin iba pang road works sa bilog na Metro Manila poon alas-12 nin matanga kan Nobyembre 1 sagkod alas-12 nin matanga kan Disyembre 23.
Sakop kaini an road reblocking, pagkaag nin mga tubo, road upgrading, asin iba pang gibo na pwedeng makaapekto sa daloy kan trapiko.
Binigyang-duon kan MMDA an pangangaipo nin amay na pagpreparar asin mahigot na koordinasyon tanganing masiguro an kaligtasan kan publiko asin an maayos na daloy kan mga sasakyan durante kan summit.
