Nag-implementar an Metropolitan Naga Water District (MNWD) nin 24/7 na operasyon sa saindang mga pumping station tanganing masimbagan an nagdadakol na pangangaipo sa supply nin tubig, orog na ngonian na padagos na an aktibidad kan Peñafrancia Festival.
Sa intrevista kan Bombo Radyo Naga ki Choppy Dy-Liacco Dela Cruz – Public Information Officer, Metropolitan Naga Water District, sinabi kaini na igwa nin 14 pumping stations na padagos na nag-ooperar asin igwa man nin dagdag na mga pumping station na pwedeng gamiton kun kinakaipuhan. Handa man an mga generator set asin supisyenteng supply nin diesel enkaso magkaigwa nin pagkaputol nin kuryente.
An mga technical teams asin duty operators naka-standby 24/7 tanganing tulos na magresponde sa anuman na problema sa mga pumping station, kabali na an mga posibleng pagtagas, pagkaraot kan kagamitan asin iba pang insidente na posibleng makaapektar sa distribusyon kan tubig.
Nag-implementar man an MNWD kan inaapod na “free-flow” activities sa nagkapirang lugar ngani na madagdagan an supply nin tubig sa central Naga asin mga lugar na piglalaoman na makakaeksperyensya nin halangkaw na pangangaipo. Handa man an mga water tanker na magserbing augmentation enkaso magkaigwa nin kakulangan.
Nangapudan an MNWD sa mga residente na magin responsable sa saindang paggamit nin tubig asin magtipon nin supisyenteng supply bilang preparasyon sa posibleng pagka-ulang kan tubig. Ipigtawan-duon lkaini an pagkonserba kan tubig mahalagang marhay tanganing mamantenir an supisyenteng suplay sa panahon na nagdadakol an populasyon asin mga bisita sa ciudad.
