Nag-aandam an Metropolitan Naga Water District (MNWD) para sa piglalaoman na paglangkaw kan konsumo nin tubig asin posibleng kakulangan nin supply ngonian na Peñafrancia Festival 2026, huli sa pagdakol kan mga deboto asin bisita sa ciudad.
Sa intrevista kan Bombo Radyo Naga ki Choppy Dy-Liacco Dela Cruz – Public Information Officer, Metropolitan Naga Water District, sinaysay kaini na piglalaoman na madugangan pa an pangangaipo sa tubig kada Setyembre huli sa pagkapano kan mga hotel, condominium asin iba pang pasilidad sa istaran. Huli kaini, nagkapirang mga istasyon nin bomba an andam na mag-operar nin 24 oras tanganing mamantenir an supisyenteng suplay.
Liwat na iimplementar kan MNWD an free-flow activity poon Setyembre 8 hasta 14 tanganing mapakusog an dalagan kan tubig hale sa mga itaas na barangay pasiring sa sentro kan ciudad. Magkapirang lugar arog kan Carolina, parte kan Pacol, Magarao, Camaligan asin pagtaraid na barangay an posibleng apektado kan schedule.
An MNWD contingency asin quick-response teams naka-standby man nin 24 oras para tulos na magresponde sa mga reklamo, leaks asin iba pang emerhensya. An mga istasyon nin tubig asin mga tambol nin tubig ibubugtak man sa mga estratehikong lugar para sa mga deboto asin bisita.
Nangapudan an MNWD sa publiko na i-conserve asin madunong na gamiton an tubig mantang yaon pa an temporaryong lakdang. Pigsierto kan ahensya na makalihis an Peñafrancia Festival maibalik an regular na sistema nin supply nin tubig.
