Lininaw na kan Metropolitan Naga Water District (MNWD) an mga rekisitos asin proseso para sa mga residente na gustong magkonektar kan saindang mga harong sa bagong koneksyon nin tubig.
Sa intrevista kan Bombo Radyo Naga ki Choppy Dy-Liacco Dela Cruz, Public Information Officer, Metropolitan Naga Water District, sinabi kaini na kaipuhan magsumiter nin Water Service Connection Application Form, photocopy kan valid ID na may retrato asin pirma, asin dokumento na nagpapatunay kan pagsasadiri kan daga arog kan titulo, tax declaration, o deed of sale. Para sa mga mayong kumpletong dokumento sa pagsasadiri, an sarong affidavit of undertaking asin sertipikasyon kan barangay pwedeng kaipuhan, siring man an sarong garantisadong deposito na ₱1,000.
Segun ki De la Cruz, nakadepende sa resulta kan inspeksyon asin teknikal na kondisyon kan lugar an total na gastos asin lawig kan bagong koneksyon. Pwedeng ma-delay o ma-disaprubaran an aplikasyon kung iguang problema sa road right-of-way, an mga tubo maagi sa pribadong daga na mayong permiso, o dae pa nagkaigwa nin pormal na turnover sa MNWD an subdivision. Nag-aako man nin online application an opisina, alagad kaipuhan man giraray na personal na isumiter an mga kinakaipuhan na dokumento. Para sa mga nag-aarkila, kaipuhan an permiso hale sa kagsadiri kan harong o daga. Pwede man na bayadan an koneksyon nin 50 por cientong down payment asin an natadang kantidad pwedeng bayadan sa hulugan sa laog nin anom na bulan, na iiba sa bulanan na bill sa tubig.
Sakop kan MNWD an Ciudad nin Naga asin an mga banwaan kan Canaman, Magarao, Gainza, asin Camaligan, alagad bako gabos na lugar sa mga munisipyo pwedeng ikonektar sa bagong linya nin huli sa limitasyon teknikal asin isyu sa rights-of-way. Mientrastanto, sinabi kan opisyal na nagpapadagos an preventive maintenance sa mga pumping station bilang preparasyon sa epekto kan El Niño. Dawa ngani an lebel kan tubig sa mga bubon yaon pa sa normal na lebel kan panahon kan interbyu, an lebel kan tubig sa mga burabod, na ibinareta na nasa Alert Level 3, buminagsak. Huli kaini, inaabisuhan an publiko na mag-conserve asin magtipon nin tubig para magamit enkaso magkaigwa nin mga interrupsyon o kakulangan sa supply.
