NAGA CITY- Pinasinayanan ngunian sa banwaan nin Minalabac, Camarines Sur kasabay kan pagselebrar kan ika-120 taon kan Aldaw nin Katalingkasan an monumento kan solamenteng Bicolanong heneral asin rebolusyonaryo kan panahon nin pananakop kan mga Amerikano.
Amay na nagpuon kasubago an mga inilatag na aktibidad sa nasambitan ng banwaan arog na sana kan sarong parada asin an re-enactment sa buhay ni Heneral Ludovico Arejola, an Bicolanong heneral na nakipaglaban kaidto sa panahon kan giyera sa pagultanan kan Pilipino asin Amerikano.
Agaw eksena man an pagsasabit nin pinakadakulang watawat nin Pilipinas sa lugar kun sain ini an pinagtarabang tabangan kan nakaaging taon na buhaton kan labi sa 100 katao na mga empleyado kan gobyerno, mga opisyal asin ordinaryong namamanwaan.
Pinangenotan man ni Camarines Sur Governor Migz Villafuerte an pagtataong honra ki Heneral Arejola kaibahan sinda Camarines Sur PNP Provincial Director PS/Supt. Jerry Bearis, si Brigadier General Arnulfo Matanguihan gikan sa 9th Infantry Division Philippine Army asin an lokal na gobyerno kan Minalabac.
Meintrastanto, sa suhay man na aktibidad sa ciudad nin Naga, pigtiripunan an nagkakapirang mga ‘living statue’ o an mga street artist na nagsulot pa nin bado kan mga katipunero komo parte kan pagselebrar sa Aldaw nin Katalingkasan ngunian na taon.
