NAGA CITY- Pigreport kan Department of Trade and Industry Bicol na maabot sa haros 20 percent na paglangkaw sa numero kan Micro, Small, and Medium Enterprises (MSMEs) an natawan nin asistensiya kan ahensiya kumparar sa nakalihis na 2024.
Sigun ki DTI-5 Regional Director Dindo Nabol, an nasambitan ng numero an naglangkaw gikan sa 28,076 pasiring sa 33,538 sa bulan nin Nobyembre.
Ngunyan na 2025, haros 19 na micro-entrepreneurs an na-upgrade sa small enterprises mantang an 11 na small enterprises an nag-transitioned sa medium enterprises.
Apwera sa DTI, nairehistro man an dugang na numero kan Barangay Micro Business Enterprises (BMBEs) gikan sa 4,617 pasiring sa 4,854 asin pangaran kan negosyo na gikan sa 36,452 pasiring sa 37,907.
Huli kaini, nag-abot na sa 66,706 an kliyente na natawan nin asistensiya gikan sa 54,792.
Nagtao man an ahensiya nin nasa 337 kits na igwang kabilugang P2.9 million sa microenterprises na naapektaran kan manlaen-laen na kalamidad sa rehiyon.
Mientrastanto, para man sa proteksyon kan consumer, nagkundusir an DTI nin 26 na diskwento caravans na kun saen naserbehan an nasa 374 barangays asin nabenipisyuhan an 8,451 na indibidwal asin nakatipon nin kita na nag-aabot sa P7.7 million sa sales.
