Ipinahayag kan Naga City Agriculture Office an mga lakdang kan ciudad tanganing mapakusog an seguridad sa pagkakan sa tahaw kan climate change, marikas na urbanisasyon, asin huma nin grabeng kalamidad.
Sa intrevista kan Bombo Radyo Naga ki Ernest Asence III – Acting Agriculturist, Naga City Agriculture Office, sinaysay kaini na pigkakarkulong 14 porsyento sana kan pangangaipo sa bagas kan syudad an makukua sa paagi kan lokal na produksyon. Dugang pa, limitado an dagang pang-agrikultura huli sa padagos na pagdakula kan populasyon asin pag-uswag kan syudad.
An mga programa kan syudad kabali an urban agriculture, barangay-level gardening, asin an pagtogdok nin sarong demonstration site sa Barangay Balatas na nagtatampok nin hydroponics, aquaponics, container gardening, asin vertical gardening. An mga teknolohiya sa pag-oma na matibay sa klima asin matalino pigpapalakop man sa pakikipagtabangan sa Departamento nin Agrikultura asin sa Taiwan Technical Mission.
Tanganing mamantenir an produktibo kan mga paraoma, an paggamit nin mga pananom na dai naaapektaran nin tigmara, permakultura, carbonized rice hull, asin iba pang mga teknolohiya na puedeng makabawas sa gastos sa produksyon itinotokdo man. Kabali man sa suporta an makinarya, seguro sa pananom, mga pasilidad sa malipot na pagtipig na pinapaandar kan saldang, asin mga bodega tanganing mabawasan an mga pagkalugi pagkatapos kan pag-ani.
Tinawan duon kan City Agriculture Office na importanteng madagdagan an ingreso kan mga paraoma tanganing ma-engganyar an mga ini na mamantenir an saindang omahan. Sa paagi kan climate-smart agriculture asin sa aktibong partisipasyon kan mga barangay, mga jovenes, asin mga komunidad, an ciudad nagmamawot na magkaigwa nin mas matibay asin sustenableng sistema nin pagkakan.
