Nag-aandam an Naga City Agriculture Office sa posibleng epekto kan El Niño asin iba pang kalamidad sa sektor kan agrikultura sa paagi kan pag-adjust kan planting schedule asin pagpreparar nin banhi asin abono para sa mga paraoma.
Sa intrevista kan Bombo Radyo Naga ki Ernest Asence III | Acting Agriculturist, Naga City Agriculture Office, sinabi kaini na an opisina ineenkaminar an mga paraoma na magpoon nang magtanom sa bulan na Oktubre sagkod sa amay na parte kan Nobyembre ngani na maibitaran an piglalaoman na grabeng init sa Enero asin Pebrero. Nakatalaan man na magdistribwir nin banhi asin abono an lokal na gobyerno sa mga masunod na semana.
Kabali sa mga barangay na vulnerable sa epekto kan kalamidad iyo an Barangay Carolina, Panicuason, San Felipe, San Isidro, Pacol asin Cararayan.
Pigtawan-duon man ni Asence an kahalagahan kan crop insurance sa paagi kan Philippine Crop Insurance Corporation (PCIC) tanganing matabangan an mga paraoma na apektado kan baha asin iba pang kalamidad.
Bilang preparasyon sa kakulangan nin tubig, irinerekomendar kan opisina an pag-adjust kan mga iskedyul nin pagtanom, paggamit nin solar-powered water pumps, pag-ani nin tubig-uran, asin pagtanom nin mga pananom na dai naaapektaran nin tigmara arog kan malunggay, okra, asin nagkapirang root crops.
Mientrastanto, matao man nin libreng cold storage service an lokal na gobyerno para sa mga burak na inani sa mga piling barangay sa paagi nin solar-powered storage facility sa City Nursery. Pig-engganyar kan opisina an mga paraoma na makipag-ulay sa City Agriculture Office para sa detalye kan mga programa asin asistensya na pwede nindang maresibe.
