NAGA CITY – Nagsasagibo sa presente an Naga City Health Office nin awareness campaign komo interbensyon manunungod an HIV. Sa nagin paghampang sa mga kagawad kan media kan mga personahes kan Naga City Health Office(NCHO), pigheras kan mga ini na kaipuhan ninda an tabang kan media tangani na mapakuriyat an saindang adbokasiya sa pagpapaluya kan labing nagdadakul nin mga kaso kan nasambitang kamatean.
An HIV mapapaluya soboot sa paagi nin awareness campaigns asin detections. Sigun sa personahes kan NCHO, an sainda nin opisina nakikipagtabangan sa manlaen-laen nin mga ahensya magin man sa lugar nin trabaho asin civil society groups.
Nagkokondusir man sinda nin mga testing asin man capacity building.
Sa mga progreso man pag-abot sa medisina asin support system bako na soboot nin life-threatening diagnosis an HIV kumparar sa dati. Dugang pa kaini kaya na kan mga may HIV na magkaigwa nin maray na buhay mantang nagsasairarom sa tamang pagbulong asin pag-aasikaso.
Mientrastanto an GentleMen Bicol for Sexual and Reproductive Health and Rights Incorporated man sarong community-based organization na naka-base sa Rehiyong Bikol na nagsasagibo nin advocacy work sa saindang komunidad sa paagi nin pagkondusir nin awareness campaign, testing, asin link to care para sa mga tawong may HIV.
An sainda man soboot nin main office yaon sa Daraga, Albay mantang posible man na magbukas na sinda kan saindang extension office sa siyudad nin Naga ngunyang Hulyo.
Sigun sa grupo ini saindang pigsasagibo tangani na mas mapahewas pa an saindang adbokasiya sa rehiyong Bikol.
An sainda man nin organisasyon makikipagtabangan soboot sa Naga City Social Hygiene Clinic tangani na mas mapahewas pa asin magkaigwa nin mga interbensyon pag-abot sa pagpapalangkaw nin kaaraman manunungod an HIV/AIDS.
