Opisyal nang piglunsar kan mga awtoridad an sarabay, dakulang implementasyon kan COMELEC checkpoint sa manlaen-laen na estratehikong lugar sa ciudad nin Naga, puon kasubagong mag-uumagahon.
Sa intrevista kan Bombo Radyo Police Lieutenant Colonel Elmer Azurez Jr., Public Information Officer, Naga City Police Office, sinabi kaini na sabay-sabay na nagbugtak nin checkpoint an gabos na istasyon kan pulis sa ciudad.
Sa laog kan enot na pirang oras kan operasyon, nakadakop an mga awtoridad an 45 violators na nag-aagi sa mga designadong Checkpoint.
Sinabi ni PLTCOL Azurez Jr. na an pinaka-komun na mga rason kan mga pag dakop o pag-aprehensyon na ini iyo an dai pagsulot nin helmet, kawaran nin lisensya sa pagmaneho o pag drive, asin iba pang mga pagbalga sa trapiko na nasabat sa operasyon.
Pigtawan-duon kan opisyal na direktang nagdidikta an Commission on Elections (COMELEC) kun ano an mga partikular na lugar o lokasyon kun saen itutugdok an mga nasabing checkpoint.
Dugang pa niyang piglinaw na bako ining mga standard na checkpoint kan pulis; igwa sinda nin laen, malinaw na nahihiling na karatula na nagpapamidbid sainda bilang opisyal na “COMELEC Checkpoint.”
Nagpagirumdom man an Naga City Police Office sa publiko na suspendido an Permit to Carry Firearms Outside of Residence (PTCFOR) mantang epektibo an operasyon na ini. An gabos na naglalaog o nagbibiyahe sa laog kan hurisdiksyon kan Naga City Police Office mantenidong sakop kan ipinapaotob na gun ban.
