Maabot sa 20,155 na indibidwal an nakatapos kan libreng Theoretical Driving Course (TDC) kan Land Transportation Office (LTO) Region 5 poon Enero hasta Hunyo 2026.
Sa intrivesta kan Bombo Radyo Naga ki Czar Byron Ceas, LTO Bicol Digital Media and Public Assistance Office Head], sinaysay kaini na sa enot na semestre sana, nakakondusir na an ahensya nin 313 na libreng TDC sessions sa Regional Office asin sa manlaen-laen na District Offices sa rehiyon.
An Theoretical Driving Course (TDC) sarong 15-oras na kurso sa pagsasanay na kabali sa mga pundamental na kahagadan bago mag-aplay para sa sarong permiso nin estudyante. Ini nagtutukdo nin mga pundamental na ley, mga susundon, asin mga regulasyon sa transportasyon sa daga, siring man an tamang pagmaneho asin mga paagi tanganing magin sarong depensibong drayber. Segun sa LTO, importante ining enot na lakdang sa proseso nin pag-aplay nin lisensya.
An mga pamantayan na dokumento na kaipuhan tanganing makakua nin permiso sa estudyante kabali an sarong balidong ID na itinao kan gobyerno, PSA o sertipiko nin pagkamundag, pasaporte o National ID, asin sarong sertipiko medikal gikan sa sarong klinika medikal na akreditado kan LTO. An mga 16 anyos pataas pwedeng mag-aplay, alagad kaipuhan an pagtugot kan magurang para sa mga menor de edad.
Dugang pa ni Ceas an LTO Region 5 nagkokondusir man nin libreng TDC sa kahagadan kan mga barangay, munisipyo asin pribadong institusyon, lalo na sa mga hararayong lugar. Sa nagkapirang kaso, sarabay man na piggigibo an pagproseso kan mga student permit tanganing mapadali an serbisyo para sa mga residente. Kun Theoretical Driving Course (TDC) sana an pig-aalok, an mga partisipante tinatawan nin Theoretical Driving Course (TDC) certificate na pwedeng isumiter sa arin man na opisina kan kan Land Transportation Office (LTO)para sa aplikasyon para sa student permit.
Mientrastanto, padagos man an pagsimbag kan kan Land Transportation Office (LTO) Region 5 sa mga reklamo dapit sa maluway na pagproseso kan rehistrasyon kan behikulo asin iba pang transaksyon. Pig-eenkaminar an publiko na isumbong sa kan Land Transportation Office (LTO) an mga reklamo laban sa mga dealers o anuman na naeksperyensyahan na problema sa proseso para sa imbestigasyon asin magkakanigong aksyon.
