NAGA CITY – Pigsaysay kan sarong konsehal sa siyudad nin Naga na an naeksperyensiyahan na labing pagbaha sa siyudad nin Naga sa pananalasa ni Bagyong Kristine magserbeng warning sa gabos na magin preparado enkaso igwang papaabuton na bagyo.
Sa naging paghampang sa mga kagawad kan media ni Naga City Councilor Vidal Castillo, sinaysay kaini na kaipuhan an preparasyon tuyong igwang pinaglalaoman na raot kan panahon tanganing dae na liwat na mautro pa an malalang epekto kan nakalihis na bagyo na nagwalat nin labing danyos sa kaharongan, negosyo, buhay asin iba pa.
Sigun pa ki Vidal, huli ta unexpected an volume kan tubig sa pananalasa ni Bagyong Kristine asin dae preparado an haros kagabusan kaya nagresulta sa devastation kan haros gabos na sektor.
Katakod digde, para soboot sa mga dalnak asin basura na yaon pa man giraray orog na sa kasentruhan kan siyudad kaipuhan an darakulang truck asin tabang kan gabos tanganing tolos na makabwelta sa normal an Naga City.
Sa ngunyan, kaipuhan man na pag-adalan pa an implementasyon kan mga flood control project siringman an padagos na paglilinig sa mga drainage tanganing makatabang sa panahon kan kalamidad.
