NAGA CITY- Nagpakol sa labi 72,000 na pamilya sa Bicol Region an naapektaran kan raot nin panahon sa puon pa kan nakalihis na semana sigun sa Department of Social Welfare and Development Bicol.
Sa latest na report, pigsaysay kan ahensiya na igwang kabilugang 155 na pamilya o katampad kan 574 katawo an nagtitinir sa evacuation centers mantang 277 pamilya o katampad kan 1,005 katawo an yaon paramientras sa mga temporary shelter o kaya sa saindang mga kapamilya.
Katakod digde, pigtawan duon kan DSWD na nagpapadagos an saindang pigsasagibong relief operations sa pakikipag-koordinar sa mga lokal na gobierno.
Huli digde, nakapagtao na an DSWD nin nasa P11.1 million na humanitarian aid sa mga apektadong komunidad asin nag-ibakwar na pamilya sa bilog na rehiyon.
Igwa man ining nakaimbak na mga food packs asin naka-standby na pondo na nagpapakol sa P264.2 million na available sa mga regional warehouses asin prepositioning sites.
Marurumduman, padagos na nakakaeksperyensiya nin pag-uuran sa kadakol na parte kan kabikolan huli sa mga bagyo asin habagat na nag-iiral sa nasyon.
Igwa man nairehistro na pagbaha sa nagkapirang lugar alagad nasisimbagan man kan mga kanya-kanyang lokal na gobierno.
Sa ngunyan, pigsierto kan DSWD-Bicol na padagos an saindang pagpapa-abot nin tabang sa mga apektadong area.
