Dagusan nang isinarado ni Naga City Mayor Leni Robredo an posibilidad na liwat sumabak sa pambansang pulitika, kabale an pagdalalagan sa pagkapresidente o pagkasenador sa 2028 national elections.
Inutro ni Robredo an saiyang desisyon sa sarong press conference sa Ciudad nin Naga kan Lunes, Nobyembre 9, sa tahaw kan padagos na pangapodan kan nagkapirang dating kaalyado asin suportador na magdalagan siya sa mas halangkaw na pwesto.
Segun sa alkalde, haloy na siyang nagdesisyon na dae na magbalik sa gobyerno nasyonal asin mayo nang makakapabago kan saiyang isip.
Pig-eksplikar ni Robredo na parte kan saiyang desisyon iyo na dae gamiton an pwesto bilang alkalde bilang temporaryong lakdang o preparasyon para sa posibleng pagdalagan sa 2028.
Pigduon man kaini na maski magdesisyon siyang dae na maghagad nin ikaduwang termino bilang alkalde kan Ciudad nin Naga, dae man giraray nangangahulugan na mabalik siya sa pulitika nasyonal.
Aminado man an dating bise presidente na base sa saiyang sadiring assessment, nahiling niya an nagkapirang limitasyon sa saiyang kakayahan na atubangon an komplikadong dinamika kan nasyonal na politika.
Dawa ngani nagtutubod siya na kaya niya an trabaho sa gobyerno nasyonal, kaipuhan suboot kaini an bastanteng political savvy tanganing maasikaso bako sana an trabaho kundi pati na an mas mahiwas na politika kan nasyon.
Mientrastanto, sinabi ni Robredo na bukas siya sa pagsuporta sa iba pang mga indibidwal na sa paghona niya may kakayahan asin maninigo na mamayo sa nasyon.
Si Robredo nagsirbe bilang bise presidente poon 2016 sagkod 2022 asin nagdalagan bilang presidente kan 2022 na eleksyon, kun saen siya nadaog ki Presidente Ferdinand Marcos Jr.
Kan 2025, nagbalik siya sa lokal na pulitika asin naelihir bilang alkalde kan Syudad nin Naga, kun saen tuyo niyang itutok an saiyang oras sa mga programa asin pangangaipo kan mga residente.
Sa ibong kan padagos na paglaog kan saiyang pangaran sa mga posibleng kandidato sa 2028 presidential race, nanindugan si Robredo na bako nang parte kan saiyang plano an pagdalagan sa arin man na national office.
