NAGA CITY- Piglatag kan Naga City Police Office an mga panundon na dapat sunudon kan publiko katakod kan pagkomemorar kan Undas 2024.
Sa nagin paghampang sa mga kagawad kan media ni Police Staff Sergeant Roberto Aguillon, Assistant Public Information Officer kan NCPO, sinaysay kaini na ipinagbabawal an pagdadara nin patarom sa mismong aldaw kan selebrasyon, bawal an paglaog nin arak, bawal an sugal siringman mahigot na ipinagbabawal an paglaog nin burat o nasa irarom na kan impluwensiya nin arak.
Apwera digde, bawal man an pagdadara nin makukusog na sound system na posibleng makaperwisyo man sa iba.
Sigun pa ki Aguillon, igwang kapulisan an mataong asistensiya sa mga tawo asin sainda soboot ipapautob an Police Presence and Police Visibility.
Dugang pa kan opisyal, igwang naka-assign sa trapiko na iyo man an mamanehar sa daloy kaini partikular an paghiling sa sitwasyon kun kinakaipuhan an pagpautob kan one way orog na sa may parte kan Balatas.
Sa ngunyan, nagpuon na an deployment kan saindang mga personahe sa mga sementeryo asin pigsierto kan opisyal an 24 oras na pagbabantay.
