Nangapodan an National Food Authority (NFA) sa mga trader na dae pag-baraton an mga paraoma sa pagbakal nin paroy o dae pa giniling na bagas.
Sigun ki NFA Administrator Larry Lacson, igwang mga lugar na nagbabakal sana soboot nin paroy sa kantidad na P11.50 hasta P15 an kada kilo, masyadong hababa kumparar sa puhunam kan mga paraoma na nag-abot sa P12 hasta P14 an kada kilo.
Basado sa mga nakalihis na procurement kan NFA napag-araman na nagbabakal ini nin clean asin dry na paroy sa presyong P23 hasta P30, mantang an fresh asin wet na paroy man an nasa P17 hasta P23 kada kilo.
Paliwanag ni Lacson, an rason kan pagbagsak kan presyo an huli soboot sa pananakot na piggigibo kan nagkapirang trader huli sa pano an bodega kan NFA.
Dugang pa digde, an pagbaba kan presyo kan bagas sa pangkinaban na merkado, na pigsunodan kan mga local millers. Tanganing matabangan an mga paraoma, nagtao nin espasyo an NFA sa mga bodega kan San Ildefonso, Bulacan.
Magigin marekas man an pagpatindog asin pagpakarhay kan 134 na bodega tanganing maglangkaw an kapasidad kan imbakan kan paroy.
Enot digde, nagbakal na man an NFA nin 14 truck tanganing direktang makabakal nin paroy sa mga lugar na hababa an presyo asin plano pang magdugang nin 600 trucks hasta sa taong 2028.
Sa ngunyan, nakabakal na an NFA kam 4.6 milyong sako kan bagas, mas halangkaw sa saindang target na 3.6 milyon.Obheto kan NFA na protehiran an kita kan mga lokal na paraoma asin masierto an bastanteng buffer stock kan bagas sa nasyon.
