Dai mababa sa limang pasyente an binawian nin buhay sa National Kidney and Transplant Institute o NKTI huli sa leptospirosis, kasunod kan pira nang semanang pag-uran asin baha kawsa kan Habagat. Base sa datos kan ospital poon kan Hunyo, umabot na sa 19 kaso kan Leptospirosis an nairehistro ninda.
An pinakahuring biktima nagadan makalihis na maglala an kondisyon asin nagkaigwa nin pulmonary hemorrhage o pagdurugo sa baga.
Segun ki NKTI nephrologist Dr. Arlene Lamban-Crosson, kadakol na pasyente an nag-aabot sa ospital na grabe na an kondisyon, huli dai ninda tulos naiisihan an mga sintomas kaya naglalala pa antes sinda makapagpa-ospital.
Kabali sa mga enot na simtomas an kalintura,makukulog na hawak asin kasukasuan, asin pamumula kan mga mata. Kun lumala na an helang, puwedeng magkaigwa nin paninilaw kan mata, pagbabago sa kolor kan ihi, asin pag-aabo o pagsuka nin dugo.
Mientrastanto, sa San Lazaro Hospital, umabot na sa 50 kaso kan leptospirosis, kabali an 24 bagong admission sa laog sana kan 24 oras.Duwa na man an nairehistrong nagadan sa nasabing ospital.
Nagpatanid an mga doktor na posible pang dai naabot an pinakamataas na bilang kan mga kaso, huli ta an incubation period kan leptospirosis puwedeng tumagal nin 2 hasta 30 aldaw.Pagirumdom kan mga awtoridad na ibitaran an paglusong sa baha, lalo na kun igwa nin lugad. Kun dai malikayan, magsulot nin rubber boots asin siguraduhon na natatahuban an ano man na lugad sa lawas.
