Noise barrage kan 3 Catholic Schools sa Naga City re pagkontra sa death penalty, matrayumpo; 800 nagpartisipar

NAGA CITY- Pigkakarkulong maabot sa poko mas umenos 800 na mga estudyante, seminarista asin paratukdo an nagpartisipar sa matrayumpong pigkondusir na noise barrage kan tolong catholic schools sa ciudad nin Naga katakod kan pagkontra sa reimposition nin death penalty.

Sa pakikipag-olay kan Bombo Radyo Naga ki Fr. Primitivo ‘Jun’ Viray Jr., president kan Ateneo de Naga University, sinaysay kaini na dae pinirit o diniktahan an mga estudyante na nagpartisipar sa nasambitang aktibidad.

Isusumiter man suboot ninda sa kongreso an position paper na pirmado kan mga estudyante asin mga nagpartisipar sa aktibidad tanganing maipaabot sa mga lehislador an saindang mahigot na pagkontra sa pagbuhay kan padusang kagadanan.

Mientrastanto, sigon man ki Mar Ampungan, saro sa mga nagpartisipar sa noise barrage, mahigot nindang pigkokondenar an pagbwelta kan death penalty huli ta dae suboot ini an solusyon sa kriminalidad sa nasyon.

Tinawan doon niya na nagbabalgar sa ley asin sa diretsos humanos an nasambitang propwestong ley.

Apwera sa Ateneo, kabale man sa nasambitang noise barrage an mga estudyante asin paratukdo hale sa Unibersidad de Sta. Isabel, Naga Parochial School asin an mga seminarista hale sa Holy Rosary Major Seminary.