NAGA CITY – Dae pighahale kan pulisya an anggulo na posibleng an New People’s Army (NPA) an nasa likod kan pagadan sa barangay kapitan sa banwaan kan Mulanay, Quezon.
Sa entrevista kan Bombo Radyo Naga ki Pol. C/Insp. Bonna Obmerga, hepe kan Mulanay-Philippine National Police, sinaysay kaini na antes badilon kan riding-in-tandem suspects an biktimang binisto sa pangarang Kapitan Domingo Ruedas, 56-anyos, nakaresibe na ini nin text message gikan sa sarong indibidwal na nagpabistong Anak Pawis asin naghahagad nin bala.
Ini soboot an pigsusundan nindang lead sa krimen asin naglalaom si Obmerga na makakakua pa sinda nin impormasyon sa cellphone kan biktima.
Enot digdi, nasa laog soboot kan saiyang tindahan sa Barangay Cambuga an biktima kan biglang mag-abot an duwang dae pa nabibistong mga suspek asin pinauranan ini nin bala.
Nagsapo nin tama sa saiyang payo asin likod an biktima na nagresulta sa tulos kaining pagkagadan.
Mientrastanto, ini na soboot an panduwang termino ni Ruedas komo barangay kapitan kan lugar asin plano pa kuta na kaining kumandidato sa parehong posisyon sa May 2018 barangay asin Sangguniang Kabataan Elections.
