Nagbaba an numero kan mga Pilipinong mayong trabaho sa nasyon sa pagtatapos kan 2024.
Sa sarong conference ngunyan na Huwebes, pig-report ni Philippine Statistics Authority (PSA) chief asin National statistician Dennis Mapa na nagtapos an taong-2024 na igwang 1.63 milyong Pilipino na mayong trabaho kan nakalihis na taon na katampad kan 3.1% umeployment rate.
Ini bahagyang mas hababa sa nairecord na 1.66 milyong Pilipino na mayong trabaho kan nakalihis na Nobyembre 2024. Boot sabihon na nasa 34,000 na mga Pilipino an nagkatrabaho sa nasambitan ng period.
Pigkonektar man kan PSA Chief an pagbaba kan numero na mayong trabaho sa seasonal increase sa demand para sa mga obrero huli sa holidays kan nakalihis na Disyembre.
Sa bilog na taon man kan 2024, nagpakol sa 1.94 million an pigkakalkulong numero kan mga Pilipinong mayong trabaho, nagbaba ini gikan sa 2.19 million na naikurit kan nakalihis na taong-2023 o katampad an 3.8% year-on-year unemployment rate.
Ini man an pigkokonsiderar na pinakahababang unemployment rate puon kan nakalihis na taong-2005.Mientrastanto, naglangkaw man sa 50.19 milyong Pilipino an igwang trabaho kan nakalihis na Disyembre 2024 o katampad kan 96.9% employment rate.
Sa bilog na taon kan 2024, naglangkaw an numero kan igwang mga trabahong Pilipino na nasa pigkakalkulong 48.85 million, o katampad kan 96.2% year-on-year employment rate.
Pag-abot man sa numero kan underemployed, nagpakol ini sa 5.48 million gikan sa 50.19 milyong employed individuals kan nakalihis na Disyembre mantang sa bilog na taon kan 2024, nasa pigkakalkulong 5.8 million an mga underemployed individuals.
Sa sarong pahayag man sinaysay ni National Economic Development Authority (NEDA) Secretary Arsenio Balisacan na nagpapahiling an pinakabagong datos nin underemployed sa nasyon kan pagmarhay kan kalidad kan trabaho asin mas dikit na obrero an naghahana nin extra na trabaho.
