Maporbar na maghirit nin medalya si two-time Olympian Ernest John Obiena sa 2025 Bauhaus-Galan pole vault tournament na gigibuhon sa Stockholm Olympic Stadium sa Sweden.
Nakatalaang mag-arangkada si Obiena alas-11 ngunyan na pagkabanggi (oras sa Pilipinas) kun saen piglalaomang iluluwas kaini an saiyang bilog na pwersa tanganing makahirit nin podium finish.
Mapapalaban si Obiena sa matitikas na pole vaulters sa kinaban kaibahan na si world champion, world record holder asin Olympic Games gold medalist Armand Mondo Dumplantis.
Mahataw man si Paris Olympics bronze medalist asin world No. 2 Emmanouil Karalis kan Greece siring man si Paris Games silver winner asin world No. 3 Sam Kendricks kan United States.
Gikan si Obiena sa masaklap na kampanya sa Oslo Bislett Games kun saen bigo ining makalaog sa Top 3.
Mayong naikurit na marka si Obiena kun saen pigporbaran kaini an 5.62 metro alagad bigo ini sa saiyang tolong pagporbar. Kaya man ‘no mark’ an naikurit kaini sa score card.
Kasuarin sana, nakakuang gintong medalya si Obiena sa sa 2025 Asian Athletics Championships na ginanap sa Gumi, South Korea.
