Itinalaan kan sarong korte sa Quezon City an mga oral na argument sa kaso nin grave threats laban ki Bise Presidente Sara Duterte huli sa saiyang kontrobersyal na pahayag sa paggadan ki Presidente Ferdinand Marcos Jr., asin duwa pang iba.
Segun sa Quezon City Regional Trial Court Branch 98, an hearing asin oral arguments gigibohon sa Agosto 20, alas 8:30 nin aga.
Tolong kaso nin grabeng pananakot an isinangat laban sa Bise Presidente.
Enot nang sinabi kan Department of Justice na nagsangat sinda nin kaso sa irarom kan Artikulo 282 kan Revised Penal Code, kasabay kan Cybercrime Prevention Act.
Enot nang naghagad an campo ni VP Sara na ibasura an kaso, huli daa sa kawaran nin hurisdiksyon kan corte.
Segun sa korte, nanindugan an Bise Presidente na posibleng magkaigwa nin seryoso asin mahiwas na epekto an kaso sa legal system sa nasyon.
An kaso nagpoon sa pahayag ni VP Sara kan 2024, kun saen sinabi kaini na may pinagbotan siyang gadanon si Presidente Marcos, First Lady Liza Araneta-Marcos asin si dating House Speaker na si Martin Romualdez kun mangyari an sarong plano nin pag-asasinar laban saiya.
Alagad, an Bise Presidente kaidto nagsabi na an saiyang mga pahayag ”taken out of logical context.”
