NAGA CITY – Pigtagamahan kan barangay council kan Tamban, Tinambac, Camarines Sur nin nasa P100-K an pagpapatugdok nin animal shelter sa saindang barangay orog na ngunyan na padagos an paglangkaw kan numero kan mga galang ayam sa saindang lugar.
Sa entrevista kan Bombo Radyo Naga ki Hon. Dominador Jun Maño Jr, kapitan kan nasambitan ng barangay, sinaysay kaini na nanotaran kaya ninda an pagdakol kan numero kan mga nagbabasay-basay na mga ido sa mga tinampo sa saindang barangay na kadalasan an nagkakawsa nin aksidente kun kaya piglapigotan ninda na maibusol asin mapondohan an konstruksyon kan nasambitan ng animal shelter.
Sa oras man na dagusan na ining maipatugdok magpupuon na sinda sa mas mahigot na pagdakop sa mga galang ido asin enkaso dae an mga ini kuanon kan saindang mga may sadiri sa laog kan tolong aldaw o mayo nin mag-adaptar sa mga ini isasairarom na sinda sa euthanisia o mercy killing.
An nasambitan ng lakdang an tanganing malikayan an pagkapano kan pasilidad asin huli na rin sa kawaran nin bastanteng pondo para sa kakanon asin iba pang pangangaipuhan kan mga ini sa laog kan shelter.
Apwera pa digdi igwa pa sinda nin iba pang proyekto siring kan saindang plaza, pagbubugtak nin solar, asin pagpapakarhay kan supply nin tubig na igwa nin kabilugang pondo na P1.4-M. Sa ngunyan, magpapadagos pa an paglapigot kan saindang lado tanganing mas orog na mapauswag an saindang barangay.
