Nag-anunsyo kan Huwebes si Presidente Ferdinand Marcos Jr. na an gobyerno matao nin saro pang ayuda nin cash assistance sa 7.5-M na mga pobre sa tahaw kan paglangkaw kan presyo kan langis huli sa panibagong tensyon sa Middle East.
Segun sa Presidente, papahiwason kan gobyerno an suporta sa mga Pilipino sa paagi kan Uplift Assistance program na iimplementar kan Department of Social Welfare and Development (DSWD).
Maabot sa 1.5 milyones na low-income earners na verify kan Social Security System (SSS) an makakaresibe nin P2,000 kada bulan puon Hulyo sagkod Disyembre o total na P12,000 sa laog nin anom na bulan.
Mientrastanto, an 3.5 million na benepisyaryo kan Pantawid Pamilyang Pilipino Program (4Ps) asin Walang Gutom Program makakaresibe nin P2,000 one-time cash grant.
Itatao man an tabang sa 2.5 milyon na pobre asin “near-poor” na mga populasyon na nabisto sa paagi kan 2024 Community-Based Monitoring System (CBMS).
Dugang pa kan Presidente, sisiguraduhon kan gobyerno na marikas asin conveniente an pagdistribwir kan ayuda sa paagi nin digital.
Nag-alokar na nin P12.375 bilyon na pondo an Department of Budget and Management para sa nasabing ayuda.
Obheto kan Presidente na mayong mabayaan na Pilipino sa tahaw kan epekto kan krisis sa Middle East.
