Kinumpirmar kan OVP Assistant Secretary asin Assistant Chief of Staff Lemuel Ortonio na an ₱125 milyon na kompidensyal na pondo kan Opisina kan Bise Presidente lubos na nagastos sa laog sana nin 11 aldaw kan 2022.
Mantang nagpapadagos an pagbista sa impeachment ni Bise Presidente Sara Duterte, iprinesentar kan prosekusyon ki Ortonio an liquidation report na nagpapatunay na an bilog na ₱125 milyones ipinaluwas poon Disyembre 21 sagkod 31, 2022.
An nasabing pondo hinagad asin itinagama para sa bilog na ikaapat na quarter kan 2022 o poon Oktubre sagkod Disyembre.
Pigprobaran kan pribadong piskal na si Atty. Mae Divinagracia na linawon kun dapat na naipanao an gastos sa laog nin tolong bulan, alagad nag-apelar an depensa huli sabi ninda basado sana ini sa assumption asin dae mismo si Ortonio nagsabi.
Si Senate impeachment court Presiding Officer Francis Escudero nagkampi sa depensa asin naghagad ki Divinagracia na baguhon an saiyang hapot.
Sa ibong kaini, kinumpirmar ni Ortonio na an good governance asin socio-economic programs na yaon sa Program Expenditure Plans o PFPs iyo an umbrella programs na binibilog kan manlaen-laen na aktibidades na nakatalaan sa bilog na taon, kabale an Oktubre, Nobyembre asin Disyembre.
Kinumpirmar man kaini na ₱125 milyones an itinagama para sa ikaapat na kwarter para sa mga aktibidad sa irarom kan programa nin marhay na pamamahala.
Nag-intervene man si Escudero asin hinapot si Ortonio kun tano kinaipuhan na gastuson an enterong pondo sa laog sana nin 11 aldaw kan Disyembre.
Segon ki Escudero, an mga appropriations sa irarom kan General Appropriations Act o GAA pwedeng gamiton sa laog nin duwang taon.
Ineksplikar ni Ortonio na an kahagadan para sa nasabing pondo ginibo para sa partikular na taon 2022 asin nakasentro an plano sa mga aktibidades para sa huring quarter kan taon.
Nagkapirang beses man na piglinaw ni Ortonio na dae siya kabali sa preparasyon kan PFP asin dae siya pwedeng magtaram dapit sa detalye kan implementasyon kan nasabing plano.
