NAGA CITY- Nakatalaan suboot na mag-utang an gobyerno sa nasyong China para sa planong reconstruction kan Bicol express train kan Philippine National Railways (PNR).
Ini an kinumpirmar ni Department of Transportation (DOTr) Undersecretary Cesar Chavez sa saiyang pahayag sa pagbisita niya sa probinsya nin Camarines Sur.
Sigon ki Chavez, sa planong reconstruction kan PNR, magkakaigwa suboot ini nin bagong riles, tren asin mga station na magiging dalan sa mas marikas asin komportableng byahe hale sa Manila hasta sa rehiyong Bicol.
Huli digdi, plano kan gobyerno na mag-utang nin labi sa P175 bilyon sa China na babayadan suboot sa laog nin 20 taon.
Nilalaoman na pipirma na an duwang nasyon sa sarong memorandum of agreement (MOA) para sa nasambitang proyekto sa Nobyembre kasabay kan ikokondusir na Association of Southeast Asian Nations (ASEAN) Summit.
