Liwat pinag-uktaba kan sarong korte sa Israel an testimonya ni Israeli Prime Minister Benjamin Netanyahu para sa kasong katiwalian, makalihis ining maghurot nin palugit tanganing hampangon an mga isyung pangseguridad katakod kan untok-putukan sa Iran asin nagpapadagos na labanan sa Gaza.
Sigun sa korte, binago ninda an naenot na desisyon makalihis na madangog an mga argumento gikan ki Netanyahu asin mga leader kan militar asin chief kan Mossad spy agency.
Katakod kaini, nangangapodan si U.S. President Donald Trump na ibasura na an kaso, na pig-apod kaining sarong “witch hunt” asin naghagad na i-kanselar ini.
Pigbatikos man ini ni Israeli opposition leader Yair Lapid, asin sinabing dae dapat nakikiaram si Trump sa saindang justice system.
Marurumdoman, si Netanyahu an nahahampang sa tolong kaso kan katiwalian, kabali an pagtanggap soboot kan mamahalong regalo gikan sa mga bilyonaryo karibay kan pabor sa pulitika, asin pagpoporbar na impluwensyahan an media para sa mas positibong coverage.
Kan Mayo 2020, nagpuon an paglilitis ni Netanyahu alagad pirang beses nang nauktaba huli sa mga kahurotan kan lado kan Prime Minister.
