NAGA CITY- Pigtawan duon kan alkalde kan siyudad nin Naga na importanteng magin preparado an gabos sa pagtama kan manlaen-laen na sakuna partikular an linog.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na kaipuhan na an mga eskwelahan asin mga pribadong kompanya sa siyudad an magkundusir nin earthquake drill komo preparasyon.
Importante na igwa man Go Bag na naka-standby tanganing igwang mabibitbit enkaso kaipuhanon. Laog kaini an pagkakan, tubig, first-aid kit, flashlight, hand-crank radio, portable phone charger, kopya kan mga importanteng documents asin panribay na bado.
Sigun ki Robredo kaipuhan na magin preparado an gabos tanganing malikayan an casualties sa panahon kan sakuna.
Mientrastanto, padagos man an pag-audit sa mga tulay sa siyudad na kun saen igwang nahiling na delikado kun kaya nag-request na soboot sinda sa DPWH na i-prayoridad an pagpapakarhay asin pagmonitor kaini.
Dugang pa kan opisyal, mayo man dakol na high rise building sa Naga alagad dae pwedeng magpakakampante asin pirmeng enoton an kasalbaduhan kan publiko.
Sa ngunyan, hagad na sana ni Robredo an pakikipagtabangan kan publiko para sa mas salbadong komunidad sa hampang kan manlaen-laen na kalamidad.
