Pigpaluwas kan US Central Command an mga identidad kan apat sa anom na soldados na nagadan sa sarong pag’atake kan Iran.
Nagadan sinda kan an sarong pigtutubudang drone kan Iran nag-atake sa sarong US command center sa Port Shuaiba, Kuwait kan Domingo.
An US Central Command enot na nagsabi na tolong soldados an nagadan sa pag’atake, alagad kan Lunes an bilang na iyan nagdoble.
Saro sa mga soldados na dinara sa ospital an binawian nin buhay huli sa saiyang mga lugad asin duwa pa an narekober sa mga narumpag na edificio.
An apat na nagadan gabos mga suldados kan US Army Reserve na nabisto bilang: Capt. Cody Khork, 35; Sgt. Noah Tietjens, 42; Sgt. Nicole Amor, 39, asin Sgt. Declan Coady, 20.
Si Khork, sarong residente kan Florida, dati nang ipinadara sa Saudi Arabia, Guantanamo Bay asin Poland.
Si Amor, sarong residente kan Minnesota, dati nang ipinadara sa Kuwait asin Iraq, mantang si Tietjens, sarong residente kan Nebraska, duwang beses nang ipinadara sa Kuwait.
Si Coady naglista sa Army Reserve tolong taon na an nakaagi bilang sarong residente kan Iowa.
