Nagpahayag nin pagkontra an Federation of Tricycle Operators and Drivers Association (FETODA) sa posibleng paglaog kan mga motorcycle taxi asin ride-hailing services sa Ciudad nin Naga, huli sa posibleng epekto kaini sa kabuhayan kan mga lokal na tricycle drivers asin iba pang sektor kan pampublikong transportasyon.
Sa intrevista kan Bombo Radyo Naga ki Gil Belen, FETODA President, sinabi kaini na sinabi kaini na posibleng magresulta sa mas mahigot na kompetisyon an operasyon kan mga motorsiklo taxi sa sektor kan transportasyon, partikularmente sa pagkua nin mga pasahero na pinagkukuanan nin ingreso kan mga tricycle drivers.
Sigon ki Belen, bako sana an mga tricycle operators asin driver an maaapektaran kan nasambitan ng plano, kundi pati na an mga jeepney asin pedestrian drivers sa ciudad.
Nagpahayag man ini kan saiyang pagkadisganar sa suboot kawaran nin konsultasyon sa mga transport groups antes na pag-olayan kan Sangguniang Panlungsod an posibleng pagpasakop kan mga nasabing serbisyo.
Dugang pa kaini na an padagos na operasyon kan colorum tricycles asin habal-habals an problema man kan sektor kun saen sa paghona kan grupo nakakadagdag sa kompetisyon asin nakakaapektar sa kita kan mga legal transport operators.
Ultimo, nangapudan an FETODA sa lokal na gobyerno na pakusugon an implementasyon kan mga eksistidong ordinansa, partikularmente an regulasyon kontra colorum operations na ipinasar kan 2012.
Suhestiyon man ni Belen an pagbugtak nin magkakanigong impounding area tangarig na maseguro an epektibong implementasyon kan mga regulasyon kontra sa mga iligal na pampasaherong behikulo.
Sa ngonian, an opinyon kan FETODA dapat muna na konsultahon an mga apektadong transport groups asin pag-adalan an posibleng epekto sa kabuhayan kan mga lokal na drayber antes mag-implementar nin anuman na polisiya dapit sa operasyon kan mga motorcycle taxi asin ride-hailing services sa Ciudad nin Naga.
