Ipigpapalipat na kan korte si dismissed Bamban, Tarlac Mayor Alice Guo sa Pasig City Jail.
Base sa commitment order kan Pasig City Regional Trial Court Branch 167 Presiding Judge Annielyn Medes-Cabelis, ipinagsugot kaini na ibalyo si Guo sa female dormitory kan Pasig City Jail, hale sa custodial facility kan Philippine National Police (PNP) sa Camp Crame.
Ini may kinaaraman sa qualified trafficking case na pig-aatubang ni Guo, may relasyon sa operasyon kan mga iligal na Philippine Offshore Gaming Operators (POGOs) sa Bamban na dati niyang pig-aasikaso.
Apwera ki Guo, ipinagsugo man kan korte an pagbalyo kan kaiba kaining akusado na si Walter Wong Long hale sa Tarlac Provincial Jail pasiring sa Pasig City Jail Male Dormitory.
Nin huli ta sarong non-bailable case, dae tinutugutan kan korte na magpiyansa an mga akusado para sa saindang temporaryong kalayaan.
Mientrastanto, nagpaluwas man nin mandamiento de aresto an husgado para sa iba pang mga akusado na at large pa.
Kabali digdi si Huang Zhiyang, Rachelle Joan Malonzo Carreon, Zhang Ruijin, Baoying Lin, Yu Zheng Can, Dennis Cunanan, Jamielyn Cruz, Roderick Pujante, Juan Miguel Alpas, Merlie Joy Castro, Rita Yturralde, Rowena Evangelista, Thelma Laranan asin Maybelline Minana alyas Shanana Yiyi.
Naaraman na nakakua nin probable cause an Pasig RTC tanganing litison an gabos na akusado katakod kan mga krimen na isinangat kontra sa sainda.
An korte nagtalaan man kan arraignment asin pre-trial conference para ki Guo asin Long sa Setyembre 27, alas 8:30 nin aga.
