NAGA CITY- Matuninong an nagin pagpuon kan eleksiyon gun ban sa banwaan nin Tinambac, Camarines Sur.
Sa entrevista kan Bombo Radyo Naga ki Kirk Thomas Tate – Comelec Election Officer III kan Lgu Tinambac, sinaysay kaini na mayo man soboot sindang nadakop na mga legal firearms asin cooperative man an publiko sa nasambitan ng aktibidad.
Sigun pa sa opisyal, aware na man an publiko na bawal magdara kan nasambitan ng firearm huli ta ini an mahigot na ipinagbabawal.
Apwera sa firearm asin an mga dea dly weapon, ipinagbabawal man soboot an firearm ammunition, replicas kan badil, mga iskupita, gun powders asin iba pang chemical ammunition, alagad kun ini man an gagamiton sa trabaho pwede soboot asin pigtutugutan kan mga otoridad.
Dugang pa ni Tate, an inisyal na numero kan naka deploy ngunyan sa mga tinampo kan Tinambac para sa check-point an maabot sa 12 mga kapulisan, asin ini man an pigsasagibo ara-aldaw.
Mientrastanto, an Comelec-Tinambac an preparado na para sa nararaning midterm election, kun saen ngunyan an kadakol sindang mga aktibidades siring kan pagselebrar kan ika-87th na anibersaryo kan Comelec na mangyayari sa January 17, siring man an pagkundusir kan ACM Road Show sa kada barangay kun saen pigtutukdo kaini kun pano gagamiton an bagong automated machine para sa eleksiyon sa bulan kan Mayo.
Katakod digde, nagpuon naman soboot an election period kan nakalihis na Enero 13 asin mapuon man an campaign period for senators sa February 11, siringman para man sa lokal an mapuon sa Marso 28.
Pigtawan-duon pa ni Tate, na kun pupuonan kan sarong kandidato an pagbabakal nin boto ini man an salang gibuhon nin huli ta igwang posibilidad na an saiyang ginastos sa eleksyon an babawion enkaso manggana.
Sa ngunyan, pagirumdom na sana kaini sa publiko magin sa mga kandidato na dae na magpurbar na maggibo nin mag mararaot na gibuhon tanganing dae magkaproblema asin magin salbado sana an gabos.
