NAGA CITY-Mawot kan mas nakakadakul nin mga Pilipino na talakayon ni Presidente Ferdinand Marcos Jr. sa saiyang ikatolong State of the Nation Address an pagsimbag sa inflation o paglobo kan presyo kan mga produkto asin serbisyo sa nasyon.
Basado sa pigpaluwas kan Pulse Asia na resulta kan pigsagibong survey gikan Hunyo 17 hasta Hunyo 24 asin pigpaluwas kasuugma Hulyo 12, mawot kan 57% kan mga Pilipino na madangog ki Presidente Marcos kun pano kokontrolon an inflation, kasabay kan saiyang ikatolong Ulat sa Bayan.
An mga respondents pinapili nin tulong isyu gikan sa dakul na mga problema sa nasyon na mawot nindang madangog sa SONA.
Apwera sa inflation, halangkaw man an nakuang boto kan isyu manunungod sa national economy na nag-abot sa 36%.
Nakakua man nin 35% an pagbilog nin mas dakul na trabaho asin livelihood, mantang 31% an mawot madangog an manunungod sa simbag kan Marcos administration sa problema sa West Philippine Sea.
An iba pang pinagpipilian kan mga respondents iyo an pagsimbag sa korapsyon, paglangkaw kan kita kan mga obrero, pagsimbag sa ilegal na droga, pagpapamaray sa education system, peace and order, asin iba pa.
Mientrastanto, mas hababa sa sarong porsyento an nagsambit na mawot nindang madangog an manunungod sa pagpapanao nin cash assistance asin paharong sa mga nagsasakit.
