NAGA CITY- Aminado an pamayuhan kan DTI-Camarines Sur na kadakol pa an kaipuhang pauswagon sa lado kan MSMEs sa enterong probinsiya.
Sa entrevista kan Bombo Radyo Naga ki Jay Percival Ablan, Provincial Director kan DTI-Camarines Sur, sinaysay kaini na nagtitinir na igwang room for improvements an mga negosyante sa Camarines Sur pag-abot sa manlaen-laen na aspeto.
Minsan sa nagigin problema iyo an haloy na decision making kan nagkapirang mga MSMEs partikular sa pigbubusol na mga programa.
Alagad ini an naiintindihan man kan ahensiya kun kaya naggigibo nin paagi tanganing matabangan an mga negosyante sa saindang hanap-buhay.
Sigun pa ki Ablan, igwa sindang pigkukundusir na mga seminar, trainings asin iba pa na kun saen nakadepende sa pangangaipuihan kan mga MSMEs.
Boot sabihon, saindang pig-assess an mga negosyante kun anupa pa an maitatabang kan DTI tanganing mapanuan. Siring na sana kan tamang paggamit kan AI sa negosyo asin iba pa.
Sa ngunyan, pigsierto na sana kan opisyal na padagos an saindang ginigibong lakdang tanganing matabangan an mga MSMEs sa bilog na probinsiya kan Camarines Sur.
