Epektibo na ngunyan na aldaw nin Sabado, Enero 31, oras sa Amerika, an partial shutdown sa gobyerno kan Amerika makalihis na mabigong maipasar an 2026 budget antes na pigtalaang midnight deadline.
An primerong rason iyo an kaanggutan kan Democrats sa paggadan kan federal immigration agents sa duwang American protesters sa Minneapolis, na nagpauktaba sa mga pag-uulay katakod sa extended funding para sa Department of Homeland Security (DHS), na namamahala sa Immigration and Customs Intelligence (ICE).
Huli sa partial shutdown, pirang non-essential government operations an piglalaomang paramientras na mauuntok kaibahan an mga serbisyo hasta sa aprubaran kan US Congress an sarong short-term funding bill o full-year budget.
Sa ngunyan, pigpoporbaran kan congressional leaders na makakalap nin bastanteng boto tanganing maipasar kan House of Representatives an inaprubarang bill kan US Senate sa oras na oras na magbwelada an session kan House sa Lunes, Pebrero 2.
Sigun ki House Speaker Mike Johnson, saindang pagbobotohan an Senate-approved budget bill, aga nin Lunes mantang sinaysay man ni US President Donald Trump na tulos kaining pipirmahan an legislation.
Ini na an ikaduwang government shutdown sa nakalihis na taon sa irarom kan ikaduwang termino ni Trump.
Ini man an labi sarong semana sana an nakalihis puon kan matapos an huring funding dispute na naghaloy nin 43 aldaw na pigkokonsiderar komo pinakahalabang government shutdown sa historya kan Amerika.
