Nag-activate an Philippine Coast Guard (PCG) nin sarong bagong internal body na aapodon na Probity Assurance Team (PAT) – Interim tanganing imbestigaran an mga iregularidad asin papanimbagon an mga kurakot na tawohan sa laog kan saindang hanay.
Segun sa tagapagtaram kan PCG na si Commodore Noemie Cayabyab, temporaryong pig-aktibo an PAT kan Abril 21 bilang parte kan pagpakusog kan disiplina sa organisasyon.
An grupo binibilog nin mga opisyales hale sa manlaen-laen na yunit kan PCG, kabali an Intelligence Force, Legal Service, asin Internal Affairs Service, asin may mandato na magtipon nin ebidensya, magsagibo nin legal na pag-arestar, asin magsangat nin mga kaso kriminal asin administratibo laban sa mga nagbabalga. Pwede man ining magrekomendar nin paghale sa serbisyo asin magtabang sa pag-akusar kan mga kaso.
Susog sa PCG, ini sarong testamento kan saindang “zero-tolerance policy” sa mga salang gawe-gawe asin an saindang pagkomiter sa halangkaw na pamantayan nin integridad.
Mientrastanto, dai pa sana nahahaloy nadakop an duwang personahes kan PCG sa magkasuhay na operasyon kontra iligal na droga sa Cebu City asin Davao City.
Kabali digdi si Apprentice Seaman Neil Vincent Dandan Panugaling, na nadakop sa Cebu kan Abril 22 sa ginibong buy-bust operation kun saen nakumpiskar an pigtutubudang shabu asin drug paraphernalia.
Nadakop man si Petty Officer 3rd Class Edgardo Lugto sa Davao City kan Abril 23 kun saen nakua an poco mas o menos 12 grams kan pigtutubudang shabu na nagkakantidad nin ₱78,000 hasta ₱81,600.
