Nagsumetir na an Philippine General Hospital (PGH) sa Sandiganbayan nin medical examination report ni dating House Speaker Martin Romualdez, na nahahampang sa kasong plunder na mayong rekomendadong piyansahan.
Gagamiton an report tanganing maaraman kun kaipuhan pa ni Romualdez na magtiner sa PGH o kun pwede na ining ibalyo sa New Quezon City Jail sa Payatas, kun sain nakakulong an iba pang imbwelto man sa flood control scam.
Linalaoman na mahampang sa Sandiganbayan saaga, aldaw nin Lunes si PGH Director Dr. Gerardo Legaspi o an saiyang representante tanganing ipresentar an resulta kan independent medical examination asin kun igwa pa nin importanteng pangangaipo tanganing palawigon pa an confinement ni Romualdez sa ospital.
Mientrastanto, sinabi kan Bureau of Jail Management and Penology (BJMP) na tulos nindang ibabalyo si Romualdez sa Quezon City Jail enkaso ipagboot kan Sandiganbayan asin ideklarang fit na ini para sa transfer.
Kun magtiner pa si Romualdez sa PGH, padagos na babantayan kan BJMP an dating House speaker sa laog asin luwas kan saiyang private room, siring man an palibot kan ospital.
Segun ki BJMP Spokesperson Jail Supt. Rex Bustinera, mayo sindang namonitor na huma ki Romualdez asin nagdadanay na normal an security situation poon kan mapasairarom ini sa saindang kustodiya kan Huwebes.
Dinara si Romualdez sa PGH hale sa Cardinal Santos Medical Center sa San Juan City kan Sabado tanganing magsairarom sa pagsusuri matapos magpaluwas nin arrest warrant laban digdi.
Si Romualdez, 62, nahahampang sa P7.4-bilyong plunder case na isinangat kan Office of the Ombudsman laban saiya asin tolo (3) pang indibidwal dapit sa sinasabing kickback scheme sa mga flood control project.
Sa motion para magdanay sa ospital, sinabi ni Romualdez na igwa siya nin Type 2 diabetes, hypertension, primary hypothyroidism asin iba pang kamatehan.
Kun ibabalyo sa New Quezon City Jail, masairarom nguna si Romualdez sa bagong assessment antes maaraman kun saen na cell ini ilalaag.
Segun ki Bustinera, karaniwan na ipiglalaag an mga persons deprived of liberty kaiba an iba pang detainees asin bako sa single-occupancy cell. Para man sa mga may helang, mas ligtas suboot kun igwang kaiba sa selda enkaso magkaigwa nin emergency.
Igwang labi sa 3,200 PDLs an Quezon City Jail, kumpara sa kinakarkulong kapasidad kaini na 4,200 sagkod 4,300 na dai nagkakaigwa nin overcrowding.
Igwang 27 bakanteng selda sa bagong renovated building kan pasilidad, apwera pa sa mga bakanteng selda sa infirmary.
An lambang selda igwang hiwas na 50 square meters asin igwang limang double-decker beds na pwedeng mag-akomodar nin sagkod 10 PDLs.
Igwang in-house doctor, 24-hour nurses asin basic medical facilities man an kulungan, kaiba an X-ray asin laboratory services.
Mientrastanto, segun sa BJMP, mga doktor asin abogado pa sana ni Romualdez an nagbisita saiya poon kan ibalyo siya sa PGH. Mayo pa suboot nagbisitang kapamilya o amigo.
Nakatalaan man na magbisita sa PGH si President Ferdinand Marcos Jr. sa Lunes nin aga, alagad dai pa ipinapaluwas an rason kan saiyang pagbisita asin dai man malinaw kun bibisitahon niya si Romualdez.
