Naiserbi na kan mga awtoridad an warrant of arrest laban ki dating House Speaker asin presenteng Leyte 1st District Representative Martin Romualdez mantang naka-confine ini sa Cardinal Santos Medical Center kan Lunes nin banggi.
Kumpirmado ni Department of the Interior and Local Government (DILG) Secretary Jonvic Remulla na opisyal nang inapod na person deprived of liberty (PDL) an dating House leader matapos na akuon niya an warrant sa saiyang kwarto sa ospital.
Tulos man na isinasairarom si Romualdez sa mga kinakaipuhan na booking procedure asin pagbasa kan saiyang mga katungdan asin karapatan, sa pangigenot kan mga awtoridad sa laog mismo kan pasilidad.
Sigun sa pahayag kan DILG, naisugod sa ospital an lehislador matapos magkaigwa nin cardiovascular event, pagtaas kan presyon kan dugo, asin anxiety attack matapos niyang mabaretaan an pagluwas kan kasuguan kan Sandiganbayan.
Nakatalaan man na magpadagos an pagbantay kan mga tauhan kan PNP sa luwas kan saiyang kwarto asin sa palibot kan ospital mantang padagos na sinusuri kan mga doktor an saiyang kamugtakan sa salud.
Muling tiniyak kan gobyerno na tulos na ililipat si Romualdez sa pasilidad kan kulungan sa Quezon City Jail sa Payatas sa oras na magtao nin medical clearance an mga espesyalista na pwede na siyang magluwas sa ospital.
