Pinawi ni Department of Trade and Industry (DTI) Secretary Cristina Roque an pagkahadit sa tahaw kan nakaambang pagpataw kan Amerika nin reciprocal tariff puon sa Abril 2.
Sigun sa sekretarya, dae maapektaran an nasyon digde huli ta magka-alyado an Pilipinas asin Amerika asin napaka-minimal sana kan trade deficit kan nasyon pag-abot sa mga pig-export na mga produkto sa Amerika.
Kaya mayo soboot dapat ikahadit sa ngunyan asin ipapadagos sana kan nasyon kun ano an piggibo kaini.
Basado kaya sa report, nakatalaan na magpautob an gobyerno kan US nin reciprocal tariffs sa mga nasyon na igwang dakulan trade deficits orog na sa mga nagpapabakal nin mas kadakol na goods sa Amerika kaysa sa pigbabakal gikan digde.
Antes pa man magbweltada sa White House, pig-anunsyar na ni US President Donald Trump na saiyang hahalion an dae makatarungang taripa na pigpataw sa Amerika asin papakusugon pa an saindang manufacturing sector.
Kaibahan sa trading partners kan US na presenteng pig-evaluate an trade deficits iyo an Canada, Mexico, Brazil, the European Union (EU), Switzerland, Turkey, South Africa, India, China, Japan, South Korea, asin Taiwan.
Siring man an 4 na Southeast Asian economies na Indonesia, Malaysia, Thailand, asin Vietnam.
Basado sa data kan US Trade Representative (USTR), nagpakol sa $23.5 billion an US goods trade sa Pilipinas kan nakalihis na taong-2024 asin igwang US trade deficit na $4.9 billion.
