KAPWA pigbibisto kan Pilipinas asin kan Malaysia an pangangaipuhang mapatatag pa an katoninongan sa West Philippine Sea (WPS).
Ini an kasunod kan nagin meeting ninda Department of Foreign Affairs (DFA) Undersecretary for Bilateral Relations and ASEAN Affairs Ma. Theresa Lazaro ki Deputy Secretary General Dato’ Ahmad Rozian bin Abd. Ghani kan Malaysian Ministry of Foreign Affairs sa Putrajaya, Malaysia.
Kapwa pigtawan-duon kan duwa an pangangaipuhan na magkaigwa nin praktikal na koneksiyon na dae maapektaran an saindang posisyon sa WPS.
Pigbisto man kan duwang opisyal an pangangaipuhan na mamantinir a katoninongan asin katatagan kan Asia-Pacific Region sa ibong kan kaniya-kaniyang claims sa disputed waters.
Kapwa igwang sadiring claims an Pilipinas asin Malaysia sa Spratly Islands sa WPS kun saen sampulong maritime feature an pig-angkin kan Malaysia.
Siring man, gabos kan sampulong feature an pig-angkin parehas kan Vietnam asin China.
Mientrastanto, apwera sa isyu sa WPS, tinalakay man kan duwa an pagsimbag sa mga humanitarian concerns kan mga Pilipino sa Sabah, kaibahan na an mga nakabinbing kasunduan, multilateral cooperation, asin iba pa.
