NAGA CITY- Pigpaliwanag kan sarong opisyal gikan sa Philhealth Regional Office V an dapit sa pig-aapod na PhilHealth Konsultasyong Sulit Tama o Konsulta Package na programa kan saindang ahensiya.
Sigun ki Leri Ilagan, pamayo kan Public Affairs Unit/ Philhealth Regional Office V, an PhilHealth Konsulta Package, sarong komprehensibong outpatient benefits na mandato kan Universal Health Care Law.
Obheto soboot kan nasambitan ng programa na matawan nin garantiya an mga Pilipino orog na an mga Bicolano sa pantay na pag-access sa de kalidad asin baratong Health Care goods asin services.
Apwera digde, obheto pa kan PhilHealth Konsulta an proteheran an salud kan mga Pilipino kontra sa mga malalalang helang.
Paglikay sa mga komplikasyon sa paagi kan detection asin pagtatao ni baratong mga bulong.
Dugang pa kan opisyal, sa irarom kan PhilHealth Konsulta, an gabos na mga Pilipino an dapat na nakarehistro sa accredited PhilHealth Konsulta Provider na saindang mawot o pinili tanganing magin eligible na makapag-avail kan programa.
Kabali na digde an Consultation, Health Risk Screening and Assessment, Selected Laboratory and Diagnostic Test asin Selected Drugs and medicines.
Katakod kaini, sa Rehiyong Bicol kadakol naman an nakapag-avail kan programa kun saen nagpakol naman ini sa labi 500-K.
An nasambitan ng numero nagpapahiling na kadakol naman an saindang natabangan sa paagi kan Konsulta package na ini. Sa ngunyan, pigsierto na sana kan opisyal na dagos-dagos an saindang mga programa para sa ikakarahay kan mga Bicolano.
